اسلام آباد۔18جنوری(اے پی پی):دفتر خارجہ دی ترجمان ممتاز زہرہ بلوچ آکھیے نگران وزیراعظم انوار الحق کاکڑ تے وزیر خارجہ جلیل عباس جیلانی پاکستان دی طرفوں ایران اچ دہشت گرداں دے ٹھکاݨے کوں نشانہ بݨاوݨ دے بعد تھیوݨ آلی پیش رفت دی روشنی اچ اپݨے غیر ملکی دورے مختصر کرݙتن ۔آپݨی ہفتہ وار پریس بریفنگ اچ ترجمان آکھیے جو پاکستان دی کارروائی ایران دے خلاف کائنی بلکہ دہشت گرد تنظیماں دے خلاف ہئی، پاکستان اپݨے پڑوسی ملک ایران نال پرامن تعلقات چاہندے تے ہمیشہ ڳالھ مہاڑ نال چیلنجز نال نبݨݨ دی کوشش کریندے ۔ انہاں آکھیے جو پاکستان اسلامی جمہوریہ ایران دی خودمختاری اتےعلاقائی سالمیت دا مکمل احترام کریندے ۔ اڄ دی کارروائی دا واحد مقصد پاکستان دی اپݨی سلامتی تے قومی مفاد دا تحفظ اے جیڑھا جو ساریں توں مقدم اے تے ایں تے سمجھوتہ نی کیتا ونڄ سڳدا ۔ ترجمان پاکستان دی طرفوں ایران دے صوبہ سیستان و بلوچستان اچ ’’انتہائی مربوط‘‘ اتے ’’خاص ہدف تے مبنی‘‘ فوجی حملیں دی کجھ ہی دیر بعد جاری کیتے ڳئے اپݨے بیان دا اعادہ کیتے۔ انہاں آکھیے وزیر اعظم ایں ویلھے ورلڈ اکنامک فورم اچ شرکت سانڳے ڈیووس اچ ہن جݙاں جو وزیر خارجہ غیر وابستہ تحریک دے سربراہی اجلاس اتے تریجھی سائوتھ سمٹ اچ شرکت سانڳے یوگنڈا دے دورے تے ہن ، انہاں ’’موجودہ صورتحال پاروں ‘‘ اپݨے دوریں کوں مختصر کر ݙتے۔ ترجمان جاری صورتحال اچ کہیں تریجھے فریق دی ثالثی بارے پچھیے ڳئے سوال تے آکھیے انہاں کوں ایجھی کہیں پیشرفت دا علم کائنی ۔ انہاں آکھیے پاکستان ایرانی عوام کوں دوست اتے بھرا سمجھدے تے صورتحال کوں مزید وڳاڑݨ اچ کوئی دلچسپی نی رکھیندا ، امید اے ݙوجھا فریق وی ایں ڳالھ دا ادراک کریسی۔ انہاں آکھیے پاکستان ہمیشہ مذاکرات دے رستے کوں چنݨیے تے او قیام امن کوں یقینی بݨاوݨ سانڳے ایران سودھے ہمسایہ ملکاں نال رابطے جاری رکھیسی ۔ ترجمان آکھیے ’’مرگ بر سرمچار‘‘ھک انٹیلی جنس تے مبنی آپریشن ہئی جیں اچ ٻہوں سارے دہشت گرد ماریے ڳئن ۔ ترجمان میڈیا کوں ݙسائے جو گزریل کئی سالاں توں پاکستان مسلسل اپݨے سنگین خدشات دا اظہار کیتے اتے ایران دے اندر خود کوں سرمچار آکھݨ آلے پاکستانی نژاد دہشت گرداں دی محفوظ پناہ گاہواں اتے ٹھاݨے بارے پکے شواہد نال ٻہوں ڈوزیئر شیئر کیتن ۔ تاں جو ساݙے سنگین تحفظات تے عمل نہ تھیوݨ پاروں اے نام نہاد سرمچار بے گناہ پاکستانیاں دا خون وہیندے رہیے ۔ اڄ سویلے دی کاروائی انہاں نام نہاد سرمچاراں دی طرفوں وݙے پیمانے تے دہشت گردی دیاں کارروائیاں بارے مصدقہ انٹیلی جنس دی روشنی اچ کیتی ڳئی انہاں آکھیے اے کارروائی پاکستان دی مسلح افواج دی پیشہ ورانہ مہارت دا ثبوت ہووݨ دے نال نال سارے خطرات دے خلاف اپݨی قومی سلامتی دے تحفظ اتے دفاع سانڳے پاکستان دے غیر متزلزل عزم دی وی مظہر اے۔
