اسلام آباد۔8نومبر (اے پی پی) وزیراعظم محمد شہباز شریف شاعر مشرق علامہ محمد اقبال دے فلسفہ خودی تے عمل کر تے ملکی معیشت کوں مستحکم اتے ملک کوں ترقی آلے پاسے ٹورݨ دا عزم کریندیں ہوئیں زور ݙتا جو اساں بحیثیت قوم محنت، محنت اتے صرف محنت کرتے پاکستان کوں عظیم ٻݨیسوں۔ عوام کوں ریلیف ݙیوݨ کیتے دسمبر توں فروری ترائے مہینے کیتے بجلی سہولت پیکچ دے تحت نرخ ڳھٹاوݨ دا فیصلہ کیتے۔ گھریلو صارفین کیتے ودھیکی بجلی دے استعمال تے فلیٹ ریٹ 26 روپے 7 پیسے ہوسی۔ اے ڳالھیں انہاں جمعے کوں یوم اقبال بارے تقریب توں خطاب کریندیں ہوئیں آکھی۔ وزیراعظم محمد شہباز شریف آکھیا جو ٻالاں کلام اقبال خوبصورت انداز اچ پیش کیتے۔ اساکوں عظیم شاعر دے فلسفے، انہاں دی حضرت محمد ﷺ نال والہانہ محبت اتے خودی دے سنیھے کوں سمجھݨ دی لوڑھ اے۔ انہاں آپݨی شاعری اچ خودی، محنت مشقت بارے جیڑھا سنیھا ݙتا او ایں دور اچ انہاں توں ودھ تے کوئی سنیھا نی تھی سڳدا۔ انہاں آکھیا جو علامہ اقبال آپݨی شاعری ”نہیں تیرا نشیمن قصر سلطانی کے گنبد پر، تو شاہیں ہے بسیرا کر پہاڑوں کی چٹانوں میں” نال نینگراں کوں خوداری دا سنیھا ݙتے۔ انہاں آکھیا جو اساں قرآن پاک، حضور اکرمۖﷺ دی تعلیمات اتے علامہ اقبال دے فرمودات کوں وی بھل ڳئے۔ جیڑھی قوماں اساں توں پچھوں ہن او اڳوں نکل ڳئن۔ انہاں آکھیا جو اساکوں علامہ محمد اقبال دے فلسفہ خودی تے عمل کرݨ دی لوڑھ اے۔ اڄوکی حکومت اللہ تعالیٰ دے فضل و کرم نال ایں ملک اچ ایں سنیھے کوں اڳوں ڳھن تے ویندی پئی اے۔ گزریل سال مہانگ دی شرح 32 فیصد ہئی جیڑھی ڳھٹ تھی تے 6.7 فیصد تھی ڳئی اے۔ بینکاں دے قرضیاں دے شرح سود ڳھٹ تھی تے 15 فیصد تے آڳئی اے۔ انہاں آکھیا جو پنجاب اچ سابق وزیراعظم محمد نواز شریف دی قیادت اچ دانش سکول ٻݨا تے ایجھے قابل ٻالاں اتے ٻالڑیاں کوں تعلیم دے موقع ݙتے جیڑھے ٻالاں دے والدین کنے بالاں کوں تعلیم ݙیوݨ دے وسائل کائنا ہن جئیں دے نتیجے اچ ہزاراں نینگر، ڈاکٹرز اتے انجینئرز ٻݨین۔ اساں پنجاب اچ ایجوکیشن انڈوومنٹ فنڈ ٻݨائے۔ باصلاحیت نینگراں اچ مفت لیپ ٹاپس تقسیم کیتے۔ وزیراعظم آکھیا جو پاکستان دے لکھاں نینگراں کوں آئی ٹی اتے مصنوعی ذہانت سودھے ووکیشنل ٹریننگ فراہم کیتی ویسی۔ شہباز شریف آکھیا جو انہاں سعودی عرب اتے قطر دے دورے اچ اتھاں دی قیادت نال ملاقاتاں اچ زور ݙتے جو زراعت، صنعت، آئی ٹی اتے معدنیات سودھے مختلف شعبیاں اچ سرمایہ کاری کیتے منصوبے ڳھن تے امساں۔ پاکستان قدرتی وسائل توں مالا مال اے۔ ایں موقع تے بجلی صارفین کیتے ریلیف دا اعلان کریندیں ہوئیں انہاں آکھیا جو سردیاں دے موسم اچ ترائے مہینے کیتے دسمبر، جنوری اتے فروری اچ صارفین کوں بجلی سہولت پیکیج ݙیوݨ دا فیصلہ کیتے۔ اے پیکیج دسمبر 2024ء توں فروری 2025ء تئیں ہوسی۔ پیکیج دے تحت گھریلو صارفین کیتے ودھیکی بجلی دے استعمال تے فلیٹ ریٹ 26 روپے 7 پیسے ہوسی، مجموعی طور گھریلو صارفین کوں 11 روپے 42 پیسے توں 26 روپے فی یونٹ تئیں بچت تھیسی۔ ایں پیکیج دے تحت صنعتاں کوں مجموعی طور 5 روپے 72 پیسے توں 15 روپے 5 پیسے فی یونٹ بچت تھیسی۔ صنعتاں کیتے مجموعی طور 18 توں 37 فیصد تئیں بجلی دا نرخ ڳھٹ تھیسی۔ کمرشل صارفین کیتے 13 روپے 46 پیسے توں 22 روپے 71 پیسے فی یونٹ بچت تھیسی۔ مجموعی طور کمرشل استعمال تے 34 توں 37 فیصد بچت تھیسی۔ انہاں آکھیا جو عوام کوں ریلیف ݙیوݨ دے ایں کم تے نائب وزیراعظم، وفاقی وزیر برائے پاور، انہاں دی ٹیم، وزیر خزانہ، وزیر مملکت خزانہ، سیکرٹری خزانہ، وزیر پٹرولیم، سیکرٹری پٹرولیم اتے ڈپٹی چیئرمین منصوبہ بندی کمیشن سودھے سارے حکام دا شکریہ ادا کرینداں ایں بارے آئی ایم ایف دا وی شکریہ ادا کرینداں۔ انہاں آکھیاجو ٻاہرلے ملک رہݨ آلے پاکستانیاں ترائے مہینے اچ 8.8 ارب ڈالر دی ترسیلات زر ٻھجوائن جئیں تے انہاں دا شکریہ ادا کرینداں۔ ایں موقع تے وزارت اطلاعات تے نشریات ولوں شاعر مشرق علامہ محمد اقبال دے حالات زندگی اتے افکار تے مشتمل خصوصی دستاویزی فلم ݙکھائی ڳئی۔ تقریب اچ معروف گلوکار شہزاد رائے اتے گلوکارہ ڈاکٹر معصومہ انور کلام اقبال پیش کیتا۔ ننھے منے ٻالاں علامہ اقبال دا دعائیہ کلام پیش کیتا۔ ایں موقع تے وزیراعظم سٹیج تے ونڄ تے انہاں بالاں دی تعریف کیتی اتے حوصلہ افزائی کیتی۔
.jpg)
