اسلام آباد۔ 8اگست(اے پی پی)وزیراعظم محمد شہباز شریف اسرائیلی کابینہ ولوں غزہ شہر دا غیر قانونی اتے ناجائز کنٹرول ڳھنݨ دے منصوبے دی مذمت کریندے آکھیے جو “اے فلسطینی عوام دے خلاف پہلے توں جاری تباہ کن جنگ اچ خطرناک ودھارے آلی ڳالھ اے۔ وزیراعظم آکھیا جو “فوجی کارروائیاں دی اے ودھوتری پہلے توں موجود انسانی بحران کوں ٻیا وڳاڑ ݙیسی اتے خطے اچ امن دے کہیں وی امکان کوں مکا ݙیسی، ساکوں ایں جاری المیے دیاں اصلی وجوہات کوں نظر انداز نئیں کرݨا چاہیدا، فلسطینی زمین تے اسرائیل دا ڳوہڑا، غیر قانونی قبضہ جݙاں تئیں برقرار رہسی امن ہک خواب ہی رہسی۔ وزیراعظم آکھیا جو پاکستان فلسطینی عوام دے اقوام متحدہ اتے او آئی سی دیاں قرارداداں دے مطابق جائز حقوق، انہاں دے حق خود ارادیت اتے فلسطین دی ہک آزاد اتے خودمختار ریاست دے قیام کیتے آپݨی غیر متزلزل حمایت دا اعادہ کریندے، جیںدا دارالحکومت القدس الشریف ہووے۔ وزیراعظم عالمی برادری توں مطالبہ کیتا جو “او اسرائیل دی بلاجواز جارحیت کوں فوراً روکن، بے گناہ شہریاں دے تحفظ کوں یقینی بݨاوݨ اتے غزہ دے لوکاں تئیں اہم انسانی امداد دی فراہمی یقینی بݨاوݨ کیتے تیکھے توں تیکھے مداخلت کرے۔
.jpg)
