بیجنگ۔14ستمبر (اے پی پی) صدر مملکت آصف علی زرداری چین دے ایوی ایشن انڈسٹری کارپوریشن (AVIC) دے ایئرکرافٹ کمپلیکس دا دورہ کیتا، جتھاں جے-10 سی لڑاکا جہاز تیار کیتے ویندن۔ ایوان صدر دے پریس ونگ توں جاری بیان موجب صدر مملکت مسلح افواج دے سپریم کمانڈر دی حیثیت نال کمپلیکس پجے اتے مختلف شعبیں دا معائنہ کیتا۔ صدر آصف علی زرداری کوں جے-10، جے ایف-17 اتے جے-20 اسٹیلتھ فائٹرز دے نال نال ڈرونز، خودکار یونٹس اتے ملٹی ڈومین آپریشنز بارے بریفنگ ݙتی ڳئی۔ انہاں انجینئرز اتے سائنسداناں نال وی ملاقاتاں کیتیاں۔ صدر ایں موقع تے آکھیا جو جے-10 اتے جے ایف-17 پاک فضائیہ کوں مضبوط بݨائے اتے مئی 2025 دے معرکہ حق اتے آپریشن بنیان المرصوص اچ انہاں جہازاں دی کارکردگی نمایاں رہی اے۔ صدر مملکت اے وی آئی سی کوں چین دی اعلیٰ ٹیکنالوجی اتے پاک-چین اسٹریٹجک شراکت داری دی علامت قرار ݙتا۔ او ایں کمپلیکس دا دورہ کرݨ آلے پہلے غیر ملکی سربراہ ہن۔ صدر دے نال چیئرمین بلاول بھٹو زرداری، خاتون اول آصفہ بھٹو زرداری اتے سینیٹر سلیم مانڈوی والا وی موجود ہن۔ ایں موقع تے پاکستان دے سفیر چین خلیل ہاشمی اتے چین دے سفیر جیانگ ژا ڈونگ وی شریک ہن۔ پاکستان دفاعی پیداوار اتے ہوا بازی دے شعبے اچ چین دے نال تعاون مزید ودھاوݨ دے عزم دا وعدہ کیتا۔ اے دورہ بھارت دے نال جنگ بندی دے 128ویں ݙینھ تھیا۔
.jpg)
